خالد صلاح يكشف عن تراجع 30% في زيارات المواقع الصحفية بسبب الذكاء الاصطناعي.. ماذا عن حقوق الملكية الفكرية؟

علق الكاتب الصحفي خالد صلاح، عبر صفحته الشخصية على «فيسبوك»، على المخاطر المرتبطة باستخدام الذكاء الاصطناعي في مجال الصحافة، حيث أشار إلى إمكانية تقديم معلومات خاطئة ومضللة، فضلاً عن تأثير ذلك على حقوق الملكية الفكرية ونسبة القراءات للمواقع الصحفية.

من نفس التصنيف: قناة النيل للأخبار تتعاون مع هيئة الرقابة النووية المصرية لمواجهة الطوارئ الإشعاعية لأول مرة

قال صلاح: “خدوا بالكوا من اللي بيحصل دلوقتي في جوجل بسبب حاجة اسمها AI Overview، اللي بتظهر فوق نتائج البحث، دي خاصية بتستخدم الذكاء الاصطناعي علشان تديك الإجابة على سؤالك من غير ما تدخل أي موقع، يعني بدل ما المستخدم يضغط على رابط ويدخل يقرأ من مصدر صحفي أو موقع إخباري، بياخد الرد على طول من فوق، مختصر وجاهز”.

وتابع الكاتب الصحفي: “المشكلة هنا مش بس إن دي معلومات ممكن تكون مليانة أخطاء، في المثال اللي في الصور مع البوست جربت أكتب رئيس تحرير الأهرام، والنتيجة قالت ماجد منير وده حقيقي، لكن جوجل عرض صورة علاء ثابت اللي مش في هذا المنصب حالياً، يعني لو حد مش عارف مين دول هياخد معلومات وصور خاطئة دون تحقق”.

وأضاف صلاح: “لكن القضية مش بس في الأخطاء والتضليل، الأخطر إن المواقع اللي تعبت وكتبت المعلومات والأخبار ونشرت الصور، والمفروض إن لها حقوق ملكية فكرية مش هتاخد حقها، يعني الإجابة السهلة اللي بتطلع دي هتقلل الزيارات والقراءات من المواقع الأصلية، وبالتالي تقلل عائد الإعلان على المواقع، وده معناه ضرب مباشر في مصدر الدخل الأساسي لأي مؤسسة صحفية رقمية”.

مقال له علاقة: تعزيز التعاون في الأمان والأمن النووي من خلال مذكرة تفاهم بين هيئة الرقابة النووية المصرية والهيئة المجرية

واستكمل: “حضرتك مش محتاج أقولك إن ده بيهدد نموذج الصحافة كله، وفيه تقارير من مؤسسات دولية بتقول إن بعض المواقع فقدت ما يقرب من 30% من زياراتها بسبب الخاصية دي، ده غير إن جوجل نفسها بتستخدم محتوى من المواقع من غير ترخيص أو احترام للملكية الفكرية”.

واختتم منشوره متسائلاً: “إزاي الصحف تفضل تشتغل وتنتج وتدفع مرتبات لمحررين وصحفيين، وفي الآخر الذكاء الاصطناعي ياخد المحتوى ويقدمه للناس على طبق من دهب بتواطؤ علني وغير قانوني من محركات البحث، ويضرب جوهر المعادلة المالية للصحف”.