مع اقتراب شهر رمضان، بتحب كل ست بيت تكون جاهزة لتحضير العصائر والمشروبات بسرعة وسهولة خلال أيام الصيام، ومن أكتر المشروبات اللي عليها إقبال هو عصير البرتقال، مش بس لطعمه اللذيذ لكن كمان لفوايده الصحية، في المقال ده هنشرح لك طرق سهلة لتخزين البرتقال سواء كفصوص أو عصير عشان يبقى جاهز طول الشهر.
أهمية تخزين الفواكه لشهر رمضان
التحضير المسبق لمكونات الأكل والمشروبات بيوفر وقت ومجهود كبير خصوصًا في شهر رمضان، تخزين البرتقال بيخليك تجهزي عصائر منعشة بسرعة بعد يوم صيام طويل، وكمان بتضمني إنك تحافظي على قيمته الغذائية من غير ما تضطري تشتريه يوميًا.
طريقة تخزين البرتقال في الفريزر كفصوص
المكونات المطلوبة:
- كمية من البرتقال.
- أكياس بلاستيكية للتخزين.
الطريقة:
- اغسلي البرتقال كويس جدًا بالمياه.
- قشري البرتقال وقطعيه إلى فصوص.
- استخدمي فوطة نظيفة أو مناديل مطبخ لتجفيف الفصوص من أي سوائل.
- قسمي الفصوص على أكياس التخزين بشكل متساوي.
- فرغي الهواء من الأكياس قدر الإمكان، وسكريها كويس.
- ضعي الأكياس في الفريزر، وكده تكوني جهزتي البرتقال للاستخدام وقت الحاجة.
طريقة تخزين البرتقال كعصير
المكونات المطلوبة:
- كمية من البرتقال.
- مياه.
- أكياس تخزين أو زجاجات بلاستيكية محكمة الغلق.
الطريقة:
- اغسلي البرتقال وقشريه.
- قطعيه إلى فصوص وضعيه في الخلاط مع كمية من المياه.
- اخلطي المكونات كويس لحد ما تتحول لعصير طازج.
- عبئي العصير في أكياس أو زجاجات، واتأكدي من تفريغ الهواء.
- خزنيها في الفريزر، وعند الاستخدام، اخرجي الكمية اللي تحتاجيها وضيفي لها السكر حسب الرغبة.
طريقة تحضير عصير برتقال مركز للتخزين
المكونات المطلوبة:
- كيلو برتقال.
- نصف كيلو سكر.
- كوب مياه.
الطريقة:
- اغسلي البرتقال وقشريه.
- في الخلاط، ضيفي البرتقال مع المياه والسكر.
- بعد الخلط، صبي الخليط في إناء وضعيه على النار حتى يغلي.
- اتركيه يبرد تمامًا ثم عبئيه في أكياس أو زجاجات.
- خزني العصير في الفريزر واستخدميه وقت الحاجة.
نصائح لتخزين البرتقال بشكل مثالي
- اختاري البرتقال الطازج والخالي من الكدمات أو العيوب.
- احرصي على تنظيف البرتقال وتجفيفه كويس قبل التخزين.
- استخدمي أكياس تخزين بجودة عالية لضمان الحفاظ على الطعم والقوام.